Azərbaycan və Almaniya arasında peşə təhsili, bacarıqların inkişafı və bilik mübadiləsi sahələrində əməkdaşlıq genişlənir

7–10 aprel 2026-cı il tarixlərində Alman-Azərbaycan Xarici Ticarət Palatası (AHK Azerbaijan) və Bildungswerk der Baden-Württembergischen Wirtschaft e.V. (BiWE) arasında əməkdaşlıq çərçivəsində Bildungswerk der Baden-Württembergischen Wirtschaft e.V. təşkilatının İcraçı direktoru və “Südwestmetall” şirkətinin Siyasət, Təhsil və Əmək Bazarı üzrə direktoru cənab Stefan Küpperin Azərbaycana rəsmi səfəri baş tutub. Proqram çərçivəsində müvafiq dövlət qurumlarının nümayəndələri ilə bir sıra institusional görüşlər və strateji müzakirələr keçirilib. Proqram çərçivəsində Azərbaycan Respublikası İqtisadiyyat Nazirliyinin müavini cənab Səməd Bəşirli, Dövlət Məşğulluq Agentliyinin İdarə Heyətinin sədri cənab Hasil Abbasov və Kiçik və Orta Biznesin İnkişafı Agentliyinin (KOBİA) İdarə Heyətinin sədri cənab Orxan Məmmədov ilə görüşlər keçirilib. Növbəti günlərdə isə Azərbaycan Sahibkarlar Konfederasiyasının (ASK) baş katibi cənab Ziya Hacılı və Ələt Azad İqtisadi Zonasının İdarə Heyətinin sədri cənab Valeh Ələsgərov ilə əlavə görüşlər baş tutub. Bu görüşlər zamanı BiWE-nin fəaliyyət istiqamətləri və iş sahələri təqdim olunub, eyni zamanda xüsusilə Azərbaycanda fəaliyyət göstərən qurumlar və şirkətlər üçün potensialın inkişafı sahəsində gələcək əməkdaşlıq imkanları ətrafında fikir mübadiləsi aparılıb. Səfər, həmçinin Azərbaycan və Almaniya arasında peşə təhsili və təlimi, bacarıqların inkişafı, institusional əməkdaşlıq və bilik mübadiləsi sahələrində əməkdaşlığın daha da möhkəmləndirilməsinə töhfə verib. Görüşlər və müzakirələr peşə təhsili ilə əmək bazarının tələbləri arasında əlaqələrin daha da gücləndirilməsinə xidmət edib, eləcə də Azərbaycan və Almaniyada aidiyyəti tərəflər arasında gələcək əməkdaşlıq üçün yeni imkanlar yaradıb.